من ترافیک چراغییام
رسول قدیری

قووشاقلاردا دیرک‌اوسته دایانمیشام. دوزه‌نله ماشینلارا گؤز ووروب یول گؤستره‌رم. بیر قیچیم و اوست-اوسته یئرلشن اوچ گؤزوم وار. هر گؤزومون دئمه‌یه اؤز سؤزو وار. گؤزلریم رنگ‌به‌رنگ‌دیر و هر اوچو چوخ قشنگ‌دیر.
بیرینجی‌ گؤزوم یاشیل‌دیر. او، أن آشاغیدا یئرلشن گؤزوم‌دور. یانینجا، باغلی یولو آچار. -ائی قارشیمدا دایانان ماشینلار! یولونوز آچیق اولسون! سوره بیلرسینیز- دئیه‌ر...
ایکینجی‌ گؤزوم ساری‌دیر. او بیر اویاری‌دیر. ساری اورتانجیل گؤزوم‌دور. ائحتیاطلی اولماغی تاپشیریر.
قووشاغین ایچینده اولان ماشینلارا، سانکی- تئز اولون! ردد اولون- دئییر؛ قووشاغا گیرمه‌ین ماشینلارا ایسه -دایانین- أمر ائدیر...
اوچونجو گؤزوم قیرمیزی‌دیر. قیرمیزی، أن اوسته یئرلشن گؤزوم‌دور. قیرمیزی خطر رنگی‌دیر. حیاتدا خطرلره فیکیر وئرمک چوخ اؤنملی‌دیر؛ اونا گؤره اونو أن یوکسک یئرده اوتورتموشام. قیرمیزی کسین اویاری‌دیر. او گؤزوم یاندیقدا، قارشیسینداکی ماشینلار دورسونلار گرک. دورمایانلار چارپیشا بیلرلر.
هردن بو اوچ رنگلی گؤزلریمدن، تکجه ساری یا قیرمیزی رنگلری، تئز-تئز گؤز وورار. بو دا او دئمک‌دیر کی، قووشاقدا ماشینلارا گئتمک یاساق دئییل، آنجاق اؤترکن موغایات اولسونلار گر‌ک.
گؤزل اوشاقلار! هر کس منیم گؤزلریمین سؤزلرینه داها یاخشی قولاق آسسا، گله‌جکده چوخ باجاریقلی و چارپیشماسیز سوروجو اولاجاق‌دیر...