اوجوز اولمایان دادلی اؤزگورلوک
یازار: ویدا حشمتی

کیچیک قوش، ایسلانمیش قانادلارین چالاراق، اؤزونو پنجره نین هئره سینه یئتیردی.
خیرداجا گؤزلرینی تیکدی اوتاغا
یاغیش هله شیددتیله یاغماقدایدی
ایسلانماقدان قاچان قوش اؤزونه بیر سیغیناجاق یئر آختاریردی
داها اوچماغا و بوندان آرتیق ایسلانماغا جسارتی یوخویدو
اوتاغین ایچینده کی دولانان اوشاغا باخدی
آجلیق امانینی کسمیشدی
دوشونوردو بلکه او ائوده دولانان اوشاق پنجره نی آچیب، اونا بیراز دن سپه
بلکه ده بو یاغیشدان، اونو قورتارا.
بو دوشونجه لره دالا - دالا بوینون چینینه قویوب - گؤزلرین یومدو.
آنا سیلا گزیب، اوچان زامانلاری خاطیرلادی؛
گؤی اوزونده دالغالی اوچوشلارین،
نئجه ایلک دفه اوچاندا یئره دوشدویونو و اونو یئرده ن قوزاییب یووالارینا آپاردیغی آنلاری حتتا بئله
اونون آغزینا دن قویان زامانلاری!
بیر آن گؤزون آچیب، اؤزون بیر آووجون ایچینده گؤردو و اوشاغین اللرینی ایستی سینی حیس ائله ین آن، کیچیک اوره گی چیرپینماغا باشلادی.
اوشاق، ایسلانان قانادلارین بیر تمیز پارچایلا قورودوب سونرا بیر قفس حاضیرلاییب - ایچه ری سالدی.
هله کیچیک قوش اؤزونو تاپمامیشدی کی اوشاق اونا دن گتیردی
بالاجا قوش، بونا چوخ سئوینیب - یئمه یه باشلادی
سونرادا قریب بیر قاب قفسه تاخیلدی
کیچیک قوش، قورخا - قورخا یاخینلاشیب
سونرا آرخایین اولونجا، اَییلیب اوندان دا سو ایچدی .
بیر سئوینج، اوره یینه قوندو هم یاغیش دان قورتولموشدو هم آجلیقدان.
اوشاق قفسی گؤتوروب پنجره نین هئره سینده، ایکی گولدانین اورتاسینا یئرلشدیردی.
قوش بئله ساندی آنا سینین ناغیلینداکی جننت بوراسی اولمالیدی

بیر نئچه گون بئله لیکله کئچدی،
اوشاق گئدیب - گلیب
قوشو دیندیریردی اونا گؤزل سؤزله ر دئییردی سونرا دا دن سپیب سویونا باخیردی
کیچیک قوش بئله دوشونوردو بوراسی چوخ گؤزل یئر دیر؛ دن وار، سو وار ، یاغیش دا یاغماییر. بیرده اوچسام بو جنتتدن هئچ زامان گئتمک ایستمه رم
بیرنئچه گون قوش یئدی - ایچدی و شنلیک ائتدی.
هردن بیر سئوینجدن اؤتوردو و اوشاق ، قوشون اؤتمه سیندن لذت آپاریردی.
آمما بو ایش اوزون سورمه دی
قوش داریخیب، اوچماق ایسته ییردی.
قانادلارین آچیب اوچماغا چالیشدی آمما قفس بالاجایدی و اوچا بیلمه ییردی. بیر داها قانادلاری یئلله ندیریب اوچماغا آتیلدی آمما قفسین نازیک میله لرینه دییب یئره دوشدو.
یورولمادان، اؤزونو قفسین دووارلارینا چیرپیردی واوچماغا چالیشیردی .
اوشاق بونو گؤروب، تئز اؤزونو قفسه یئتیردی و قوشو ساکین لتمک ایسته دی . نه ایسه کی قوشون قراری یوخودو و اوره یی هر آن، چیرپینیردی - اوچماغا.
باشین - قانادین او ال - بو اله چیرپاراق، آز قالیردی او کیچیک اوره یی یئریندن چیخا آمما اوزون سورمه دی و یورغون حالییلا دوشوب بیر یاندا اوتوردو.
یئنه بوینونو چینینه قویوب، قم - کدر  ایچینده دوشونمه یه باشلادی.
او گؤنلری خاطیرلادی کی آناسیله اؤزگور - اؤزگور اوچوردو، کیچیک قوش اؤز - اؤزونه دئدی: "بوراسی جننت دییلمیش، بوراسی منیم زیندانیم دیر،
آخی، نئجه گؤی اوزونه حسرت قالیب - یاشایا بیله رم؟!"

و یئنه سوزلرین آردین توتاراق دئدی: "
بیر یول تاپیب، بوردان قورتولماغیم لازیم،
آممابو، نئجه اولاجاق؟"
نئچه گون کئچدی، کیچیک قوش نه دن یئییردی نه ده سو ایچیردی
حالسیز بیر یئرده قالیب داها  او طرف -بو طرفه  آتتیلماییردی .
غملی - غملی گؤزون پنجره دن ائشیکده کی بولودلارا تیکیب - دالیردی.
آرتیق گوجو قالمامیشدی، یئمک ده خوش گلمه ییردی.
اوشاق قوشو بئله گؤرونجه  اوزولوردو  .
هردن بارماغییلا قوشون باشینی اوخشاماق ایسته ییردی
امما کیچیک قوش اوندان اوزاقلاشیب، بیر گؤشه ده میسیب قالیردی .
ایندی اوشاق دا آنلامیشدی بو کیچیک قوش داریخیب و گئتمه ک ایسته ییر  آمما اوشاق بو قوشا باغلانمیشدی و اونو قفسدن بوراخماق ایسته میردی.
کیچیک قوش هر گون کئچدیکحه داها گوجسوز اولوردو، یئمه یین اوزونه باخمادان، اؤتمه دن گونلری کئچیردیردی.
گونشلی بیر گونودو، هاوا چوخ گؤزل ایدی.
اوشاق پنجره یه یاخینلاشیب، ائشیکده کی اوچان قوشلارا باخدی، چوخ گؤزل گؤرونوردولر، بیر - بیر لرین آردینجا اوچاراق، او آغاجدان - بو آغاجا قونوردولار.
بیر آن باشین دؤنده ریب، گؤزلرین اوتاقدا اولان قفسه زیلله دی، دریندن بیر آه چکه¬رک، پنجره نی آچماغا باشلادی.
سرین بیر یئل اسدی و اوتاغین هاواسین یئنی لندیردی.
قوش کی باشی چینینده بیر طرف ده قالمیشدی بوسرین هاوایی حیس ائدیب ، قوشلارین سسین دویونجا  باشین قووازادی.
گونشین ایشیلتیسین گؤروب،  ایچیندن بیر گوج گلدییینی گؤردو .
بو آن اوشاق الین آپاردی قفسه و قوشو آووجونونا آلدی .
کیچیک قوش شاشیب - قالمیشدی آمما اوره یی یئنه چیرپینماغا باشلادی.
اوشاق الین پنجره دن چیخاردیب، قوشو هاوایا آتدی و گؤزون قوشا تیکدی.
قوش هاوایا بوراخیلاندا، اؤزونه گلیب ,قاناد چالماغا باشلادی
آرتیق یئنی دن اوچوردو بو سئوینجله بیر اوطرفه - بیر بو طرفه اوچوب پنجره دن اوزاقلاشیب، بیر آغاجین بوداغینا قوندو.
او درین باخیشلارین، اوشاغا زیلله
یه رک، اوچا - اوچا او بیری قوشلارا قاریشدی.